2003 жылғы зілзала құландықтардың жадынан өшпесе керек. 28 наурыз күні түн жарымында болған жер сілкінісі Меркі, Тұрар Рысқұлов, Қордай, Мойынқұм аудандары мен Тараз , Шу қаласы аумағына дейін жетсе де, меркіліктер мен құландықтар кәдімгідей даурығып кетті. Себебі жер дүмпуінің жоғары қарқыны аталған екі ауданда тіркеліп, халықты қатты әбігерге түсірді.
Өңірдегі жер сілкінісі билік назарынан тыс қалған жоқ. Мемлекет басшысы Қасым-Жомарт Тоқаев Жамбыл облысының әкімі Ербол Қарашөкеев пен Төтенше жағдайлар министрі Шыңғыс Әріновтің баяндамасын тыңдап, Үкімет басшысы Олжас Бектеновке әлеуметтік нысандар мен бүлінген тұрғын үйлерді қалпына келтіру бойынша жедел іске кірісуді тапсырды.
Қазіргі кезде өңірдегі ахуалды Премьер-министр жеке бақылауына алған. Үкімет басшысының тапсырмасына сәйкес өңірде болған жер сілкінісіне байланысты жергілікті атқарушы билік өкілдері жағдайды зерделеу, жедел шаралар қабылдау жұмысын үйлестіріп жатыр. Төтенше жағдайлар вице-министрі бастаған үкіметтік жұмыс тобы өңірге келіп, жағдаймен танысты.
28 наурыз күні болған жер дүмпуі сол күні түс әлетінде бір қайталанды демесек, одан кейін қауіп төнетіндей жағдай туындаған жоқ. Өңір басшысы Ербол Қарашөкеев бастаған жергілікті билік өкілдері таң бозынан Меркі, Тұрар Рысқұлов аудандарына ат басын бұрып, бүлінген әлеуметтік нысандар мен тұрғын үйлерді аралап шықты. Кейіннен Төтенше жағдайлар вице-министрі Кеген Тұрсынбаев бастаған үкіметтік комиссия мүшелері де Тұрар Рысқұлов ауданында болып, зардап шеккен тұрғын үйлер мен әлеуметтік нысандарға арнайы ат басын бұрды.
Комиссия мүшелері мен облыс басшысы Ербол Қарашөкеев алдымен Тұрар Рысқұлов ауданы аумағындағы Жаңатұрмыс ауылына барды. Елді мекендегі бірнеше үйдің қабырғасында жарықшақ пайда болғанын көрген өңір басшысы баспанасы бүлінген азаматтарға атаулы әлеуметтік көмек көрсетілетінін жеткізді.
Ресми дерекке сенсек, ауылдағы білім ошағының қабырғасында жарықтар пайда болғаны анықталған. Е.Қарашөкеев білім алушыларға қолайсыздық тумауы үшін жауаптыларға қалпына келтіру жұмысын жедел жүргізу керектігін шегелеп тапсырды.
Қазір Мемлекет басшысының тапсырмасына сәйкес келтірілген шығынды бағалау, бүлінген мүлікті қалпына келтіруге қатысты нақты жұмыстар жүргізіліп жатыр. Құрамында облыс әкімдігінің, сейсмологиялық бақылау және зерттеулер ұлттық ғылыми орталығының, тиісті ведомстволардың өкілдері бар жұмыс тобы жағдайды толықтай бақылауға алған.
Комиссия мүшелері Меркі, Тұрар Рысқұлов ауданына қарасты бірнеше елді мекендегі ғимараттар мен тұрғын үйлерді аралап, техникалық тексеру жұмысын жүргізді. Ресми дерекке сенсек, екі ауданда жалпы саны 17 әлеуметтік нысан бүлінген. Оның 11-і – білім беру, екеуі денсаулық сақтау, екеуі әлеуметтік қорғау, біреуі спорт, тағы біреуі мәдениет саласына қарасты мекемелер. Ауылдық округ әкімдеріне қазіргі уақытқа дейін баспананың бүлінгені туралы 104 арыз-шағым түскен. Комиссия мүшелері тұрғын үйлерді тексеру жұмысын жалғастырып жатыр. Шығын көлемі алдағы күндері анықталады.
Таң шапағы көрінгенше мазасы қашқан жұрт жергілікті атқарушы билік өкілдерінің жұдырықтай жұмылғанын, барлық қауіпсіздік шараларын қабылдағанын, халықпен тікелей байланыс орнатқанын көрген соң еңсе тіктеді.
«Мемлекет басшысы өңірдегі жағдайды жеке бақылауына алды. Президент әлеуметтік нысандар мен тұрғын үйлерді қалпына келтіру, жөндеу жұмыстарын жүргізуге қажетті көмек көрсетуді жүктеді. Үкімет басшысының тапсырмасымен үкіметтік жұмыс тобы да жедел іске кірісті. Өңір тұрғындарының қауіпсіздігін қамтамасыз ету бойынша тиісті жұмыс атқарылды. Халықтың қауіпсіздігі ілкі сәтке де назардан тыс қалмайды», дейді өңір басшысы Е. Қарашөкеев.
Қалай десек те жер дүмпуі Меркі, Тұрар Рысқұлов ауданы тұрғындарының құтын қашырғаны анық. Абырой болғанда, жергілікті атқарушы билік өкілдері дер кезінде жұдырықтай жұмылып, барлық қауіпсіздік шарасын қабылдады. Жер сілкінісі салдарынан келтірілген шығын толық есептеліп жатыр. Алдағы уақытта әлеуметтік нысандар мен тұрғын үйлердің бүлінген қабырғаларын қалпына келтіру жұмысын жедел аяқтау міндеті тұр.
Жамбыл облысы
