Қазақстан әлеуметтік фармацевтикаға, яғни, дәрі-дәрмек сән-салтанат емес, нақты көмек болатын жүйеге бір қадам жақындады .
Денсаулық сақтау министрлігі ірі фармацевтикалық компаниялармен маңызды меморандумдарға қол қойды. Бұл келісімдер мыңдаған науқас үшін елеулі өзгеріс әкелмек, деп хабарлайды Caravan.kz медиа порталы.
Бұрын қымбат болып келген және өмірлік маңызды дәрі-дәрмектер енді қолжетімді болады.
Келісімнің негізгі тармақтарының бірі Johnson & Johnson компаниясының Спинраза (Нусинерсен) препараты бойынша баға саясатын қайта қарау. Бұл тіркеуден өткен, спинальды бұлшықет атрофиясын (СМА) емдеуге арналған жалғыз дәрі. СМА сирек кездесетін және өлім қаупі жоғары генетикалық ауру. Енді оның Қазақстандағы сатып алу бағасы төмендейді, бұл өз кезегінде көбірек науқастарға ем алу мүмкіндігін ашады.
«Химфарм» компаниясы да 2-типтегі қант диабетіне қолданылатын Дапаглифлозин препаратының бағасын төмендетуге келісті. Қазақстанда бұл диагнозбен 520 мыңнан астам адам өмір сүреді, оның 95%-ы дәл осы түріне жатады. Бағаның төмендеуі заманауи емдеу тәсілдерін кеңінен қолдануға жол ашады.
Ал «AstraZeneca» компаниясы Қазақстанда жергілікті өндіріс жолға қойылған бірқатар өмірлік маңызы бар дәрі-дәрмектердің бағасын төмендетуді жоспарлап отыр. Компанияның бағалауынша, бұл бірнеше миллион пациенттің инновациялық емге қолжетімділігін арттырып, олардың денсаулығына оң әсер етеді.
Меморандумдар тек баға мәселесін ғана емес, келесі маңызды бағыттарды да қамтиды:
— шекті сауда үстемелерін сақтау;
— баға динамикасын тұрақты бақылау;
— инновацияларды қаржыландыру тетіктерін дамыту;
— үздік халықаралық тәжірибемен алмасу;
— дәрі-дәрмекпен қамтамасыз ету саласындағы заңнаманы жетілдіру бойынша ұсыныстар енгізу.
Шын мәнінде, пациент мүддесін басты орынға қойған тұрақты фармацевтикалық нарықты қалыптастыруға бағытталған жүйелі қадамдар жасалды. Бұл жай ғана қаржылық үнем емес, өмір мәселесі, әсіресе сирек әрі ауыр дертпен күресіп жүргендер үшін маңызды шешім. Қазақстан әлеуметтік фармацевтикаға, яғни, дәрі-дәрмек сән-салтанат емес, нақты көмек болатын жүйеге бір қадам жақындады.
