Көп ішекті көне аспапты кеңірек насихаттауды мақсат тұтқан іс-шараны өңірде бірінші болып Федоров ауданы қолға алып отыр. Байқауға 10 ауданның жетігеншілері қатысып, бесеуі жүлделі орынға ие болды.
«Жетігеншілер байқауы балалар арасында жиі болып жүр, бірақ ересек орындаушылар арасында республика көлемінде бірінші болып өткізіп жатырмыз. Аудан әкімдігі жүлде қорына 1 млн теңге қаржы бөлді. Білуімше, көне аспап ХІХ ғасырдың ортасына дейін жеткен. Одан кейін қолданыстан шығып қалған. Еліміз тәуелсіздік алған тұста этнографтардың айтуымен жетілдірілген түрі қайта жасалып, үлкен сахналардан көріне бастады. Біздің ауданның тұрғындары жетіген үнін алғаш рет 2020 жылы естіді. Аудан әкімінің қолдауымен жергілікті үш өнерпазымыз Алматыға барып, Құрманғазы атындағы ұлттық консерваторияда Нұргүл Жақыпбектен тәлім алды», дейді Федоров аудандық мәдениет және тілдерді дамыту бөлімінің басшысы Данияр Сәрсенбетов.
Байқау аясында Алматы қаласынан қазылар алқасының төрайымы ретінде арнайы шақыртылған кәсіби маман Нұргүл Жақыпбек өңір орындаушыларына жетігеннің көне бұрау әдістерінен шеберлік сағатын өткізді.
«Жетігеннің сазды әуені тыңдаушының жүрегін бірден баурап алатын себебі – бұл аспап ұлттық жадымызда қалғып жатқан ескі әуендерді оятады, халықтың бай тарихынан сыр шертеді. Байқауға қатысқан үміткерлердің бәрі шет өңірде жетігенді насихаттап, дәріптеп жүрген санаулы өнерпаздардың қатарынан», дейді Нұргүл Жақыпбек.
Сайыс қорытындысында өнерпаздар байқауының бас жүлдесін Федоров аудандық мәдениет үйінің қызметкері, бесаспап өнерпаз Фариза Жоламанова жеңіп алды. Ал Меңдіқара ауданынан келген Гүлжан Нұрмұхамбетова бірінші орыннан көрінді. Сарыкөл ауданының өкілі Рысжан Біржанқызы мен Алтынсарин ауданының өнерпазы Алтынай Төлеген екінші, үшінші орындарды өзара бөліссе, Федоров ауданынан қатысқан Динара Мырзахметова облыстық көркемөнерпаздар орталығының арнайы сыйлығына ие болды.
Ұйымдастырушылар келесі жылы жетігеншілердің республикалық байқауын ұйымдастыруды көздеп отыр.
Қостанай облысы
