Медицина мекемесінде екі корпус: 148 орындық стационар және клиника науқастарына арналған 24 орындық қонақ үй қарастырылған.
Үкімет Мемлекет басшысы Ұлттық құрылтайдың төртінші отырысы барысында алға қойған Өскемендегі Гематология орталығын жеделдетіп пайдалануға беру туралы тапсырмасын жүзеге асыру аясында Арнаулы мемлекеттік қордан 33,6 млрд теңге бөлді, деп жазады inbusiness.kz сайты.
Бас ғимаратта заманауи медициналық құрал-жабдықтармен қамтылған зертханалар, сәулелік диагностика, кардиология, кардиохирургия, гематология, сүйек кемігін трансплантациялау және күрделі соматика бөлімшелері орналастырылады. Жаңа орталық науқастар емдеу мен оңалтудың озық әдістеріне қол жеткізуге мүмкіндік береді.
Жобаның жалпы құны – 71,3 млрд теңге. Бүгінде нысанның 78%-ы аяқталған. Ғимараттың қаңқасы тұрғызылып, сыртқы инженерлік желілер тартылған, шатыр, қасбеті, терезе блоктары дайындалып, ішкі әрлеу жұмыстары ішінара аяқталған.
Үкімет денсаулық сақтау жүйесіндегі инфрақұрылымды дамытуға ерекше көңіл бөліп келеді. 2024 жылдың қорытындысы бойынша "Ауылда денсаулық сақтауды жаңғырту" ұлттық жобасы аясында 361 алғашқы медициналық-санитариялық көмек көрсету нысанының құрылысы аяқталды. Бұл өз кезегінде шалғай және ауылдық елді мекендер тұрғындарына медициналық қызмет көрсетудің қолжетімділігін арттыруға мүмкіндік берді.
Бүгінде Үкімет әлеуметтік маңызы бар нысандар құрылысына Арнаулы мемлекеттік қордан қаражат бөлді. Олардың қатарында 7 мектеп, оның ішінде бір музыка мектебі, 2 спорт кешені, стадион, көпсалалы аурухана кешені, облыстық жедел жәрдем стансасы, Арнаулы әлеуметтік қызметтер көрсету орталығы, жатақхана, 2 балабақша бар. Бұдан бөлек, қаражат Қызылорда облысының Арал ауданындағы сумен жабдықтау жүйелерін салу және жаңғыртуға бағытталды.
Жұмыс жалғасып жатыр.
"Орталықта күндізгі және тәулік бойы жұмыс істейтін стационар, соматика бөлімшесі, кардиология, кардиохирургия, сүйек кемігін трансплантациялау, химиотерапия бөлімшесі қарастырылған. Біз ультра жүйелік жабдықты орнатамыз. 2025 жылы екі ангиографиялық жүйе іске қосылады. Мұнда жоғары технологиялық медициналық операцияларды жасай аламыз. Бұл біздің пациенттерімізге және біздің мамандарға көбірек мүмкіндіктер береді. Бұл жабдық ТМККК-ға кіреді", — деп атап өтті ШҚО денсаулық сақтау басқармасы басшысының орынбасары Мәдина Мырзабекова.
