1 наурыздағы жағдай бойынша жергілікті атқарушы органдардың рұқсатымен ел аумағында 13 584 шетел азаматы еңбек етеді , деп хабарлайды Egemen.kz.

Айта кетейік, бүгінде елімізде шетел жұмыс күшін пайдаланатын 1 744 жұмыс беруші бар, олардың қатарында 377,6 мыңнан астам қазақстандық азамат еңбек етеді. Бұл жұмысшылар жалпы қызметкерлер санының 96,5%-ын құрайды.

«Шетел жұмыс күшін (бұдан әрі – ШЖК) тартуға рұқсаттардың арасында мынадай санаттар бар: басшылар мен олардың орынбасарлары үшін 569 рұқсат (бірінші санат), құрылымдық бөлімшелердің басшылары үшін 2 514 рұқсат (екінші санат). Тартылған ШЖК негізгі бөлігі үшінші (мамандар) және төртінші (білікті жұмысшылар) санаттарға жатады – тиісінше олар 4 711 және 1 010 адам. Сондай-ақ маусымдық жұмыстарға 1 217 адам, ал корпоративтік ауыстыру аясында 3 563 адам тартылды», деп хабарлады Еңбек және халықты әлеуметтік қорғау министрлігі.

Шетел жұмыс күшін ең көп экономикалық салалар құрылыс, ауыл шаруашылығы, өңдеу өнеркәсібі және тау-кен өнеркәсібі тартады. Еңбек мигранттары негізінен Қытайдан (4 945 адам), Үндістаннан (1 169 адам), Түркиядан (1 165 адам) және Өзбекстаннан (1 056 адам) келеді.