2025 жылғы 16 маусымда Қазақстанның Атомдық энергия агенттігі болашақта АЭС-те жұмыс істейтін мамандарды қалай даярлау жоспарланып отырғанын айтты, деп хабарлайды Zakon.kz тілшісі.
Қазіргі уақытта атом саласына қажетті білікті кадрларды даярлау физика, энергетика, электротехника және тау-кен инженериясына байланысты 18 білім беру бағдарламасы бойынша қарқынды жүргізіліп жатыр.
"Мамандарды даярлау еліміздің жоғары оқу орындарында – Д. Серікбаев атындағы ШҚТУ, Л.Н. Гумилев атындағы ЕҰУ, Әл-Фараби атындағы ҚазҰУ, Г. Дәукеев атындағы АЭжБУ, С. Аманжолов атындағы ШҚУ және Шәкәрім атындағы мемлекеттік университетте, сондай-ақ ядролық технологиялар бойынша маманданған шетелдік жетекші университеттермен ынтымақтастық аясында жүзеге асырылуда. Сонымен қатар, ядролық физика, ядролық инженерия, ядролық физика және атом энергетикасы, теориялық ядролық физика сияқты бейінді білім беру бағдарламалары бойынша қос диплом алу мүмкіндігі қарастырылған", – деп хабарлады ведомствода.
Шетелдік бағдарламалар бойынша оқуға гранттар бөлу, сондай-ақ жұмыс істеп тұрған АЭС-терде өндірістік тәжірибеден және тағылымдамадан өту ұйымдастырылады.
"2024–2025 оқу жылына атом саласы мен өнеркәсібіне қатысты бағыттар бойынша 5000-нан астам грант бөлінді. Бұл ретте 2023–2024 жылдары осы бағыттарда білім алып жатқан студенттер саны шамамен 250 адамды құрады. 2011–2023 жылдар аралығында 1600-ден астам маман даярланып шықты", – деп толықтырды Қазақстанның Атомдық энергия агенттігі.
Бұған қоса, Қазақстанда атом саласында жоғары білікті мамандар жұмыс істейтін Ұлттық ядролық орталық пен Ядролық физика институты сияқты ғылыми-зерттеу институттары бар екені айтылды.
"Қазіргі таңда үш оқу орталығының базасында атом энергетикасына байланысты 5000-нан астам маман даярланды. Сонымен қатар, жас мамандарды Франция, Ресей Федерациясы және Венгриядағы атом нысандарына тағылымдамаға жіберу арқылы халықаралық ынтымақтастық аясында кадрларды даярлау жоспарлануда", – деп хабарлады ведомствоның баспасөз қызметі.
Бұған дейін АЭС салу таңдауының неліктен "Росатомға" түскенін жазған болатынбыз.
