Барлық реакторлардың жобалық қызмет ету мерзімі 60 жылға тең.
Атом энергетикасы жөніндегі агенттік алғашқы АЭС-ты неге "Росатом" салатынын түсіндірді, деп хабарлайды inbusiness.kz сайты.
"Росатом" – әлемдегі ядролық технологиялардың негізін қалаушы, ең дамыған әрі тәжірибесі мол "атом мектебіне" ие компания. 1954 жылы әлемдегі алғашқы атом электр станциясы Обнинск қаласында іске қосылды. Сонымен қатар, әлемдегі алғашқы өнеркәсіптік жылдам нейтронды реактор – БН-350 ресейлік технология бойынша салынған және ол Каспий теңізінің жағалауындағы Ақтауда жұмыс істегенін атап өткен жөн", – делінген агенттіктің жауабында.
Атом энергетикасы жөніндегі агенттік барлық реакторлардың жобалық қызмет ету мерзімі 60 жыл екенін баса айтты.
"Алайда кореялық APR1000 және француздық EPR1200 реакторларының нақты пайдаланылу тәжірибесі жоқ. Бұл тұрғыда ресейлік ВВЭР-1200, қытайлық HPR1000 және кореялық APR1400 технологияларының нақты тәжірибесі бар. Ресей, Қытай және Франция ядролық отын циклының барлық кезеңдеріне қатысады, ал Корея бұл салаға толыққанды қатыспайды. Сонымен бірге, Ресей мен Қытай ядролық отын циклының жекелеген элементтерін Қазақстанда жергіліктендіру мүмкіндігін қарастыруға дайын. Сондай-ақ Ресей мен Қытай өз елдерінде де, шет мемлекеттерде де 20-дан астам реактор салып жатыр. Ал Франция мен Корея қазір тек екі реактордан салып жатыр: Кореяда – APR1400, Чехияда – APR1000, Ұлыбританияда – EPR1600 технологиясы", – делінген жауапта.
Бұдан бөлек, Ресей мен Қытай халықаралық консорциумдар жұмысына кең көлемде қатысу тәжірибесіне ие. Олар түрлі өндірушілердің жабдықтарын бір жоба аясында тиімді түрде біріктіре алады.
"Жалпы, қазіргі уақытта тек Ресей мен Қытай ғана қаржыландырудан бастап, ядролық-отын циклін қайта бөлуді оқшаулауға, кадрларды даярлауға, пайдаланылған ядролық отынды жобалауға, салуға және өңдеуге дейінгі қызметтердің толық кешенін дербес ұсына алады", – деп хабарлады агенттік.
Айта кету керек, бұған дейін еліміздегі алғашқы АЭС-ты "Росатом" салатыны туралы шешім өзгермейтінін жазғанбыз. "Росатом" Қазақстандағы АЭС-тың құрылысына ғана жауапты.
