Елордада полиция қызметкерлері ғимараттардың бірінің маңдайшасындағы LED-жолақты бұзу дерегіне қатысы бар төрт жасөспірімді анықтады. Қазіргі уақытта осындай құқық бұзушылықтың төрт эпизоды тіркелген, деп хабарлайды Zakon.kz polisia.kz-ке сілтеме жасап.
Кәмелетке толмағандармен олардың заңды өкілдерінің қатысуымен профилактикалық әңгіме жүргізілді. Сонымен қатар ата-аналарына балаларды тәрбиелеу жөніндегі міндеттерін тиісінше орындамағаны үшін жауапкершілік жүктелді.
Полиция ата-аналарды балалардың тәртібін бақылауға және бос уақытын қадағалауға көбірек көңіл бөлуге үндеді.
Сонымен бірге полиция электрондық құрылғылардың жұмысына араласу, оларды бұзу әрекеттері, сондай-ақ қоғамдық тәртіпті бұзатын жазбалар мен бейнелер орналастыру – заңға қайшы әрекеттер болып есептелетінін ескертті. Мұндай құқық бұзушылықтар үшін заңда көзделген жауапкершілік қарастырылған, ол бұзушының жасына қарамастан қолданылады.
