Жеңіл атлетикадан Токиода өтіп жатқан әлем чемпионатында Нора Джеруто сәтті өнер көрсетіп жатыр. 3000 метрге кедергілер арқылы жүгірудің іріктеу сайысында ол мәре сызығын екінші болып қиып өтті. Осы нәтиженің арқасында еліміздің желаяғы финалға жолдама алды. Команда сапындағы тағы бір кениялық легионер Дейзи Джепкемей мәреге тоғы­зыншы болып келіп, финалға өте алмады. Финалдық бәсекелер 17 қыркүйекте өтеді.

• Футболдан еліміз Премьер-лига­сының 23-туры мынадай нәтижелермен аяқ­талды: «Атырау» – «Тобыл» 1:0, «Қызылжар» – «Оқжетпес» 3:1, «Ордабасы» – «Жеңіс» 2:1, «Тұран» – «Ұлытау» 1:1, «Қайрат» – «Ақтөбе» 1:0, «Астана» – «Елімай» 3:3. Соңғы кездесудегі жеңісінен кейін «Қайрат» жарыс кестесінде жеке-дара көш бастап тұр. Алматылықтардың қоржынында 49 ұпай бар. Екінші орындағы «Астананың» басты қарсыластарынан екі ұпайы кем. Үшінші сатыға жайғасқан «Тобылда» 44 ұпай. Алайда қостанайлықтар өзге клубтардан бір ойын кем өткізген.

• АҚШ-тың Лас-Вегас қаласында өткен кәсіпқой бокс кешінде аса ауыр салмақта сынға түскен Иван Дычко (15-0, 14 КО) америкалық Джермейн Франклиннен (23-2, 15 КО) ұпай санымен ұтылды. Бұл – отандасымыздың спорттық мансабындағы алғашқы жеңілісі. Жарыстың басты жек­пе-жегінде АҚШ-тың дүлдүлі Терренс Кроу­форд (42-0, 31 КО) Мексиканың мақтанышы Сауль «Канело» Альваресті жеңіп, екінші орта салмақтағы (63-3-2, 39 КО) әлемнің абсолютті чемпионы атанды.

• Парижде ұйымдастырылған «Шақыру кубогінде» еліміздің гимнасты Нариман Құрбанов алтын тұғырға көтерілді. Ол «ат» жат­тығуында 15,066 ұпай жинап, же­ңіс­ке жетті. Күміс, қола медальдарды арме­ниялық Гамлет Манукян (14,800 ұпай) мен ита­лиялық Габриэле Таргетта (14,733) ие­ленді. Еліміздің тағы бір спортшысы Зей­нол­ла Ыдырысов төртінші орынды қанағат тұтты.

• Теннисшілердің әлемдік рейтингі жаңартылды. АТР тізімінде испаниялық Карлос Алькарас алдына жан салар емес. Оны италиялық Янник Синнер мен гер­маниялық Александр Зверев өкше­леп келеді. Еліміздің бірінші ракеткасы Алек­сандр Бублик 19-орында тұр. Александр Шевченко – 96, Бейбіт Жұқаев – 207, Дмитрий Попко – 219, Тимофей Скатов – 235, Михаил Кукушкин – 259-орын­дарда. Әйелдер арасындағы үздік үштік – беларусьтік Арина Соболенко, польшалық Ига Швентек, америкалық Коко Гауфф. Еліміздің беткеұстары Елена Рыбакина ТОП-10-дықты түйіндеді. WTA рейтингінде Юлия Путинцева – 61, Зарина Диас – 233, Жібек Құламбаева 302-сатыға табан тіреді.