Алматыда қауіпсіздікті арттырып, кептелісті азайту мақсатында жол қозғалысын реттеудің жаңа жүйесі енгізіліп жатыр. Осы орайда қаладағы 10 көшенің қиылысында "вафельді" жол белгісі салынған, деп хабарлайды Telegram-дағы AlmatyJoly арнасына сілтеме жасаған KAZ.NUR.KZ.

"Бұл арнайы жол торы қиылыстың реттелетін аймағын көрсетіп, жүргізушілердің кептеліс кезінде жолды бөгеп қалуының алдын алады", — делінген хабарламада.

"Вафельді" жол белгісі қаладағы мына қиылыстарда пайда болған:

• Абай даңғылы – Назарбаев даңғылы;
• Абай даңғылы – Масанчи көшесі;
• Абай даңғылы – Брусиловский көшесі;
• Абай даңғылы – Момышұлы көшесі;
• Абай даңғылы – Тұрғыт Озал көшесі;
• Абылай хан даңғылы – Бөгенбай батыр көшесі;
• Сәтбаев көшесі – Наурызбай батыр көшесі;
• Сәтбаев көшесі – Жароков көшесі;
• Жандосов көшесі – Жароков көшесі;
• Розыбакиев көшесі – Төле би көшесі.

Сондай-ақ хабарламада пилоттық режимде құқық бұзушылықтарды тіркейтін камералар қойылып жатқаны айтылған. Жоба сәтті жүзеге асса, ол қаланың басқа да қиылыстарына қойылады.

"Жаңа жол белгісі мен заманауи тіркеу құралдары – Алматы көшелерінде жол қозғалысын тиімді ұйымдастыру және қауіпсіздікті арттыруға бағытталған жүйелі жұмыстың бір парасы", — делінген хабарламада.

Мәтіннен қате тапсаңыз, бізге жазыңыз