1 сәуірден бастап бірінші сыныпқа өтініш қабылдау басталды
Бұл туралы Caravan.kz медиа порталы Sputnik.kz-ке сілтеме жасап хабарлайды.
Бүгіннен бастап қазақстандықтардың өмірінде біраз өзгеріс болады. Төрт күннен кейін мопедтерге қатысты шектеулер күшіне енеді. Ал көлік салығын төлемегендердің есепшоты бұғатталуы мүмкін. Бұдан бөлек, ұялы байланыс тарифтері көтеріледі.
Бүгіннен қалдырмай төлеу керек
2024 жылға көлік салығын төлеу мерзімі 1 сәуірде аяқталады.
Ертең, 2 сәуірден бастап көлік салығын уақытылы төлемеген жүргізушілерге салық берешегі туралы хабарлама жолданады. Ал берешек сомасы 1 АЕК-тен (3 932 теңгеден) асып тұрса, салық бұйрығы шығарылып, сот орындаушыларына мәжбүрлеп өндіріп алуға жіберіледі. Салық бойынша барлық қарызды 30 күннің ішінде төлеу керек.
Заңнамаға сәйкес, сот орындаушылары банктік шоттар мен мүлікті бұғаттауға құқылы. Сондай-ақ, берешек сомасы 40 АЕК-тен асқан кезде ел аумағынан шығуға тыйым салынуы мүмкін.
Көлік салығын есептеу кезінде 2024 жылы қолданыста болған 3 692 теңге мөлшеріндегі айлық есептік көрсеткішті негізге алады. Оны kgd.gov.kz порталында және «e–Salyq Azamat» мобильді қосымшасында калькулятордың көмегімен де есептеуге болады.
Бірінші сыныпқа құжат қабылданады
1 сәуірден бастап бірінші сыныпқа өтініш қабылдау басталды. Ол 31 тамызға дейін жалғасады. Ата-аналар баланың құжаттарын электронды үкіметтің еgov.kz веб-порталы арқылы тапсыра алады.
Қажетті құжаттар:
ата-ананың немесе заңды өкілінің өтініші;
№065у формасындағы денсаулық жағдайы туралы анықтама;
026/у-3 баланың денсаулық паспорты;
екі дана 3х4 фотосуреті.
Өтініштер демалыс және мереке күндерді қоспағанда, дүйсенбіден жұмаға дейін қабылданады.
Павлодар әуежайы жабылады
Бүгіннен бастап Павлодар әуежайы жабылады. Ол жерде ұшу-қону жолағын жөндеу жұмыстары жүргізіледі. Осыған байланысты барлық әуе қатынасы жарты жылға тоқтатылады.
Қазіргі кезде Павлодар қаласына Астана мен Алматыдан әуе рейстері жиі жасалады.
Мопедтерді тіркеу керек
5 сәуірден бастап заңды түрде тіркелмеген мопедтердің жүруіне тыйым салынады.
Жол қозғалысы ережесіне енгізілген өзгерістерге сәйкес, бұдан былай мопедте мемлекеттік тіркеу нөмірі болуы қажет. Ал иесі А1 санатындағы жүргізуші куәлігін алуы шарт. Бірақ А немесе В санаты болса, мопедті басқаруына рұқсат беріледі.
Мопедті тіркемей жүргізгені үшін айыппұл қарастырылған. Оның көлемі — 39 320 теңге. Осы көлік құралдарын тіркеу тәртібімен мына жерде танысуға болады.
Жол ережесін жиі бұзатындар ақшадан қағылады
7 сәуірден бастап көлік жүргізушілері үшін сақтандырудың жаңа жүйесі енгізіледі. Бұдан былай жол ережесін жиі бұзатындар үшін сақтандыру полисі қымбатқа түседі.
«Бонус-малус» жүйесі коэффициентпен есептеледі. Мәселен, 13-класс ең жоғары және ең арзан сақтандыру санаты болып қалады. Ал ең төменгісі — М2. Көлік жүргізуші жол ережесін өрескел бұзған жағдайда сақтандыру класы М2-ге дейін төмендей береді. Осылайша, полис құны 13-класқа қарағанда жеті есе қымбат болады.
Көлік жүргізу куәлігін жаңадан алған адамдар да сақтандыру полисі үшін көбірек ақша төлейді.
Kcell мен Activ тарифтері өседі
21 сәуірден бастап Kcell кейбір тарифтік жоспарлар бойынша ай сайынғы төлемді көтеруді жоспарлап отыр. Мәселен, «Алға-1» жоспары 23,4 процентке – 2 990 теңгеден 3 690 теңгеге көтеріледі. Сол сияқты «Престиж XS» пен «Престиж S» жоспарлары 500 теңгеге қымбаттайды.
Activ те 21 сәуірден бастап кейбір тарифтік жоспарларын 300-700 теңгеге көтермекші.
Altel мен Tele2 не істейді
Altel компаниясы 26 сәуірден бастап 13 бірдей тарифтік жоспардың бағасын өсіреді. Мәселен, Non Stop 6 890 теңгеден 7 990 теңгеге дейін, ал Unlim 5 990 теңгеден 8 990 теңгеге дейін өседі. Осылайша, Altel тарифтері 1000-3000 теңгеге қымбаттайды.
«Абоненттік төлемнің өзгеруі жағымды жаңалық емес екенін түсінеміз. Алайда желілерімізді дамыту мен жаңарту, оған қызмет көрсету мен жөндеу шығындарының өсуіне байланысты тарифтің бағасын өзгертуге мәжбүрміз. Тариф құнына инфляция және басқа да сыртқы факторлар әсер етеді», — делінген компанияның ресми хабарламасында.
Ал, Tele2 тура сол күні «Үй интернеті+» тарифінің ай сайынғы төлемін 3 500 теңгеден 5 000 теңгеге дейін көтерейін деп отыр. Олар да бағаға «инфляция және басқа да сыртқы факторлар әсер етті» дейді.
