5 шілдеде Францияның Лилль қаласында әлемнің ең беделді көпкүндік веложарысы – "Тур де Франс 2025" басталады.
Биыл бұл айтулы бәйгеде Қазақстан намысын екі мықты велошабандоз – Евгений Фёдоров пен Алексей Луценко қорғайды.
Фёдоров XDS Astana Team сапында өнер көрсетсе, Луценко Israel–Premier Tech командасы құрамында сынға түседі.
Қазақстанның көк байрағын әлем алдындағы ең әйгілі веложарыста көтеру – екі спортшы үшін де үлкен жауапкершілік пен мәртебе.
"Тур де Франс 2025" жалпы саны 21 кезеңді қамтиды. Жарыс бағытымен велошабандоздар бүкіл Францияны шарлап, әйгілі Пиреней мен Альпі асуларын да кесіп өтеді. Ал соңғы кезең 27 шілдеде Париждегі Елисей алаңында өтпек.
XDS Astana team командасынан Евгений Федоровпен бірге Давиде Баллерини, Кейс Бол, Клеман Шампуссан, Серхио Игита, Майк Тёниссен, Харольд Техада, Симоне Веласко жарыс жолына шығады.
Велошабандоздарымызға сәт сапар, жарқын жеңістер тілейміз!
