Қытайдағы Пекин университетінің Онкология орталығы мен өзге де ғылыми институттардың зерттеушілері қатерлі ісікпен ауыратын науқастардың өмірін едәуір ұзартатын жаңа иммунотерапия әдісін әзірледі, деп хабарлайды El.kz интернет порталы.

Бұл зерттеу The Lancet ғылыми журналында жарияланды.

CAR-T терапиясы дегеніміз не?

CAR-T деп аталатын әдіс генетикалық түрлендірілген иммундық жасушаларды қолдану арқылы қатты (солидті) ісіктермен күресуге бағытталған.

Әлемдегі алғашқы рандомизацияланған зерттеу нәтижесінде асқазан және өңеш-асқазан түйісуінің (ГАЖ) алдыңғы сатыдағы обыры бар науқастар стандартты ем алғандарға қарағанда CAR-T терапиясын қабылдаған кезде 40% ұзағырақ өмір сүргені анықталды.

CAR-T терапиясын қабылдағандардың орташа өмір сүру ұзақтығы – 7,9 ай, ал стандартты емдеуде – 5,5 ай. Сонымен қатар, ремиссия кезеңі де ұзақ болған: CAR-T тобында 3,3 ай, стандартты емдеуде 1,8 ай ғана.

CAR-T терапиясының жаңа мүмкіндіктері

CAR-T терапиясы бұрын қан қатерлі ісігіне қарсы тиімділігін дәлелдеген болатын. Енді ғалымдар оның сүт безі, өкпе және ұйқы безі қатерлі ісігі сияқты барлық обырлардың шамамен 90%-ын құрайтын солидті ісіктерге қарсы әлеуетін көрсетті.

Тағы бір зерттеу нәтижесінде CAR-T жасушалары ми ісігінің ең агрессивті түрі – глиобластомаға қарсы тиімді болуы мүмкін екені анықталды. Алдын ала деректерге сәйкес, бұл терапия ісік көлемін азайтып, науқастардың өмірін ұзартады.

Оқи отырыңыздар:

• Ақтөбеде дәрігер жоғалып кетті
• Күйеуі мұрны мен құлағын кесіп тастаған әйелдің жағдайы белгілі болды

Сарапшылардың пікірі

Мамандардың айтуынша, CAR-T терапиясы онкологиялық ауруларды емдеу тәсілін түбегейлі өзгертіп, бұрын емделмейтін қатерлі ісік түрлерінен зардап шегіп жүрген науқастарға жаңа үміт сыйлайды.